Пискаревский летописец: В лета 6900 преосвященный Кипреян митрополит постави Полотску епископа Феодосия. Toe же весны преставися княгиня Ольгирдова Ульяна, дщи князя Александра тферскаго, нареченна во мнишеском чину Марина; ...

В лета 6900 преосвященный Кипреян митрополит постави Полотску епископа Феодосия. Toe же весны преставися княгиня Ольгирдова Ульяна, дщи князя Александра тферскаго, нареченна во мнишеском чину Марина; и положена бысть в пещере на Киеве. Преставися митрополит Ма[т]фей гречин андреянопольский, в пяток 6 недели по пасце; и положен бысть у Михай¬лова чюда. Преставися Павел, епископ коломенский. Того же лета Кипреян митрополит постави на Коломну епископа Григория. Преставися владыка Еуфимей тверский Вислень; и положен быть на Москве у Михайлова чюда за олтарем. Приходи на царя Тахтамыша из Шамахейской земли царевичь, и бысть им бой силен. Поиде в Орду князь великий Василей Дмитреевичь июля 16 день ко царю Тахтамышу. Подписана бысть на Коломне церковь камена Успение богородицы, юже созда великий князь Дмитрей Ивановичь. О преставлении преподобнаго игумена Сергия троецкаго. Toe же осени сентября 25 день, на память преподобныя Ефросиний преставися пре¬подобный и богоносный отец наш игумен Сергий троецкий, иже в Радонежи, иже начальник и учитель всем монастырем, иже в Руси; и положен бысть в отчине и обители святыя Троица, иже сам созда. Князь Семен Лугвений иде из Новагорода в Литву ко братии своей Ольгердовичем. Toe же осени месяца октября в 24 день приде из Орды от царя Тактамыша великий князь Василей Дмитреевичь, многу честь от царя прием и дары, еще же придаст ему к великому княжению и Новгород Нижний и Городец со всеми что ни есть в власти их, тако же Мещеру и Торусу. Толику же честь прия от царя, яко же ни един от прежних великих князей не прият, тако ни от которого царя. Сице удиви господь милость свою на нем, и бысть тогда радость велика в Рустей земли. О брани с новогородцы, о розмирие. Toe же осени заратишася новогородцы к великому князю, приела бо к ним князь великий Василей Дмитреевичь Ивана Всеволожича и Данила Ти-мофеевича о черном бору и о грамоте, иже целовали новгородцы, что к митрополиту не зватися им на Москву о судех, а судити было владыце: “И вы к митрополиту ото[шли]те грамоту, а целование с вас митрополит снимает”. Новгородцы же того не послушаша, и в том ся учинило розмирие. О Витофте. Король Ягайло дал Витофту Кестутьевичю княжение литовское. Месяца ноября в 6 день, на память Павла исповедника князь великий Василей Дмитреевичь иде с Москвы в Новгород Нижний, и с ним боя[ре] его старейши, и пребысть тамо до рождества Христова, и паки возвратися на Москву, намесничество приказа Дмитрею Александровичю Всеволожю. О Да¬ниле Феофановиче. Toe же зимы преставися февраля в 13 день Данило Феофановичь, нареченный в мнишеском чину Давид, иже бе истинный боярин великого князя и правый доброхот, служаш[е] бо государю безо л[ь]сти в Орде и на Руси [паче] всех, и голову свою складаше по чюжим странам, по незнаемым местом, по неведомым местом, многи труды понес и многи истомы претерпе. Егда [же] бежа из Орды [князь Василей], и тако угоди своему господеви. И тако тогда великий князь, люб[ве] ради и[же] к нему на погребение его, зжалився по нем, прослезися и тако плака на много час. Положен бысть в манастыри у Михайлова чюда близ гроба дяди его, Алексея митрополита.