Повесть о женитьбе Ивана Грозного на Марии Темрюковне:

Царь же зря на нея и во изумлении велицЪмь бЪ, дивися красотЪ лица ея и добротЪ тЪла ея. И рече: «Блаженна сия красота, яко въ велицЪй радости веселитися имаши». Емъ ю за руку ея и посади на престолЪ своемъ подле себя. И любезно облобызася. И всЪмъ велможам повелЪ поклонитися ей. Они же падоша на землю пред нею. Посемь повелЪ царь нянькамъ своимь вести въ свЪтлицу ея и нарядити в порфиру и вЪнець, самь же нарядися во одеяние свЪтло и вЪнець возложи на главу свою.

И посла по митрополита Филиппа. И вскоре митрополит прииде. И рече ему царь: «Отче честный! Совокупи мене законнымъ бракомъ с любезнЪйшею моею». И повелЪ извести предъ митрополита. Изведоша же ея, она же поклонися ему. Митрополитъ же благослови ея честным крестомъ, рече царю Иоанну: «Радуйся, царю великодержавный и честный самодержче, яко обрЪлъ еси сожителницу себЪ подобну величеству твоему, обрЪлъ еси сокровище себЪ, полно камении драгиих и чюдныхъ! Величайся съ сею красотою во многолЪтном здравии вовЪки». И поклонися царю и царице до земли, и повелЪ итъти царю с царицею въ соборную церковь пресвятыя богородицы честнаго ея Успения. Митрополитъ же повелЪ всему собору облещися во священнический чинь, самъ же во всю священную одежду облечеся. И нача священная по чину дЪйствовать, яко же правила повелЪваютъ: сотвори прежде обручание, потомъ вЪнчание и повелЪ начати священником божественную литоргию. И прияша царь и царица святое причащение от руку его. И по отпусте проводи ихъ митрополитъ с чюдотворными иконы въ царские его полаты и, молебная совершивъ, возвратися въ митрополию свою. Царь же многи дары митрополита одари и весь священный соборъ.