Сегодня и вчера

Любавский Матвей Кузьмич. Очерк истории Литовско-Русского государства до Люблинской унии включительно.—М., 1915. С. 391

VIII. Привилей всей земли Волынской на права и вольности их. [ 1547 год ]

(Литовские Метрики кн. Записей XXXI, л. 56 -56)

Во имя Божье станься. Иж всякие вчипки цнотливые, которые з обычаев людских походять и бывають в заховалостях их деланы, которые ж на знаимость звычаю вчинного часы своими явне ся оказують и верне а стале доконують, годно есть, абы слушне теж вчинности своей поживали и были бы ознаймены на писмах выложеные и потвержоные для ведомости потом пришлое людское, абы часу посполитого с памети не сходило. Прото мы, Жикгимонт Август, Божыо милостью король Польский, великий князь Литовский, Руский, Пруский, Жомойтский, Мазовецкий и иных. Чиним знаменито сим нашим листом, кому будеть потреб того ведати. Били нам чолом духовные и светские— владыка Володимерский и владыка Луцкий и князи, и панове, и земяне, и вся шляхта Волынское земли и покладали перед нами привилей короля его милости старшого и великого князя Жикгимонта, папа отца нашого, в котором пишеть, иж они клали перед его милостью отцом нашим листы деда нашого Казимира и дяди нашого Александра, славное памети королей их милости, на права и вольности свои, которые листы, права их, его милость король старший, пан отец наш, рачил им, всей земли Волынской, потвердити и при моцы заховати, и на то его милость привилей свой им дал,—и били они нам чолом, абыхмо и мы водле того привилья отца нашого заховали и на то привилей наш им дали и потвердили быхмо им тые права нашим привильем, и держали их подлуг права их земли. А так мы, углянувши у привилей короля его милости старшого, пана отца нашого, на прозбу их то есмо вчинили и тые права и вольности их, как было за деда и дяди нашого, королей их милости, и за отца нашого короля его милости старшого, при моцы заховываем и тым привильем нашим потвержаем: Иж старосты и наместники наши не мають па них децких своих слати первым разом: коли на кого жалоба прийдеть, ино того первым листом и другим обослати; а коли на тые два листы не станеть, тогды децкого послати; а коли за тым децким не станеть, ино децкованье маеть заплатити, а старосте и наместником нашим на том всказати и отправити. И теж который слуга або чоловек князьский и панский а любо земянский убьеть кого, ино старосты и наместники наши и маршалок земский, и ключник, и конюший на них годовщины бирали, и дед и дядя, и отец наш то им отпустили и листы права их милости на то перед нами покладали. Ино мы, тых листов и прав выслухавши, и так жо подлуг тых листов деда и дяди нашого и отца нашого то есмо им отпустили: нехай они з слуг и з людей своих, хто в головщину впадеть, сами головщину на слугах и на людех своих беруть, а старостам и наместником нашим не надобе з их слуг и з людей головщины брати. А князей и панов, и земян старосте нашому злыми словы не соромотити, в казнь и в вежу их не сажати; а естли бы который провинил што князь або пан а любо земянин, ино старосте нас обослати: как мы его навчим листом або послом нашим, што бы имел с тым вчинити, ино ему подле науки нашое то вчинити. А такеж, што били челом и жаловали деду и дяди нашому, иж старосты и наместники наши вины и заруки на них беруть и людей их судять и рядять, ино дед и дядя наш то им отпустили: старосте и наместником нашим вины и заруки на них самых и на их людех не брати и людей их не судити, судити им самым люди свои и вины брати каждому з своего человека; нижли кому хто заручить колко коп па нас, а тая бы зарука доведена была на кого справным доводом, ино то есть в нашой воли…